Endrick drejt largimit nga Real Madrid? Marseille gati të bëjë lëvizjen vendimtare në janar

Real Madrid me shumë gjasë nuk do të bëjë asnjë transferim gjatë afatit kalimtar të dimrit, por pritet të ketë disa largime nga “Santiago Bernabéu”. Një prej tyre mund të jetë sulmuesi brazilian Endrick Felipe, i cili po përballet me mungesë minutash në ekipin e parë.

Edhe pse Ferland Mendy është përmendur si kandidat për t’u larguar, duket se më e mundshme është një lëvizje nga sulmi, pasi Endrick dhe Gonzalo Garcia kanë pasur shumë pak hapësira në këtë fillim sezoni. Gonzalo ka qenë zëvendësuesi kryesor i Kylian Mbappé, ndërsa Endrick nuk ka luajtur asnjë minutë që nga kthimi i tij nga dëmtimi në shtator.

Sipas raportimeve të L’Équipe, nëpërmjet GFFN, 19-vjeçari ka tërhequr interes nga Olympique Marseille, klub që kishte shfaqur interes edhe gjatë verës. Burime pranë lojtarit thonë se ai do të ishte i hapur për një lëvizje në Ligue 1, veçanërisht nëse kjo do t’i siguronte minuta të rregullta dhe një vend në listën e mundshme të Brazilit për Kupën e Botës 2026.

Real Madrid, megjithatë, nuk ka në plan të lejojë një transferim të përhershëm të talentit brazilian, por një huazim deri në fund të sezonit shihet si zgjidhja më e përshtatshme për të gjitha palët.

Nëse situata e tij në Madrid nuk ndryshon në javët e ardhshme, Endrick pritet të jetë një nga emrat më të përfolur të merkatos së janarit.